Paroli di kansono
Lenadi Moucina
**************
Texto da Lenadi Moucina

LA ULTIMA VALSO

Kun la eveso livas  la quintesenco
di nia cerebro lucida,
quankam  laudi pri nia Eminenco
dolcesas  por anmi kandida
nam segun nova rezulti di la cienco
neuroni falas matida.

Ol valsas per pasi timida  
La kansono di la ultima koncienco

Do amiki me vidas exter la fenco
ke balde en  voyo arida
rulas la lent' e peniva dilijenco 
vice vetureti rapida 
Yel! la yardeki facas jurisprudenco :
verki videsos insipida.

Ol valsas per pasi timida  
La kansono di la ultima koncienco

Do kar amiki kun vua induljenco
Audez da me la tepida 
lasta ma sen plenipotenco
kansono ante la livida 
grimasi di desgravidoza intenco
qua guatas kun hungro avida.

Ol valsas per pasi timida  
La kansono di la ultima koncienco

Me ne timas ke balde la audienco 
Esus pokope translucida
nam nultempe on vidis ke la frequenco
di la kliki esis splendida 
mem dum la periodo di infloresenco 
di cerebro ankor fluida

Ol valsas per pasi timida  
La kansono di la ultima koncienco

Do kar amiki nun taco e silenco 
vice la kreado trepida
kande esis ankor valida
La oldulo ante la lasta dezinenco
qua marchas per pasi lucida
an la pordeto di la lasta sentenco
...